Ertzainek bi gizonezko atxilotu zituzten atzo, Ortuellako Urioste auzoko enpresa batean lapurreta egiten saiatu ondoren. Segurtasun-jagole batek eman zion Ertzaintzari lapurretaren berri eta susmagarrien deskribapena, eta patruila batek furgoneta batean alde egiten ari zirela geldiarazi zituen.
Lapurreta-ahalegina atzo, igandea, gaueko hamarrak eta hogeian gertatu zen Ortuellako Urioste auzoko enpresa batean. Inguruko instalazioetako segurtasun-jagole batek deitu zuen Ertzaintzara hainbat pertsona enpresa bateko atea behartu nahian ari zirela esanez. Segurtasun-jagoleak ustezko lapurren deskribapena eman zion Ertzaintzari, eta furgoneta batean zihoazela jakinarazi zion.
Bertara hurbildu zen patruilak ihesi zihoala topo egin zuen susmagarrien furgonetarekin. Agenteek bi bidaiariak, bi gizonezko, identifikatu zituzten, eta lekukoak emandako deskribapenarekin bat zetozela egiaztatu zuten.
Identifikatu ondoren biak arrastatu zituzten, enpresako atea behartuta eta markoa tolestuta zegoela eta lapurrek instalazioak inguratzen dituen hesiaren gainetik jauzi egiteko egurrezko ohol bat jarri zutela egiaztatu ondoren. Horrez gainera, furgoneta barruan dirudienez enpresan lapurreta egiteko erabili zituzten Stillson giltza bat, mazo bat eta mailu bat aurkitu zituzten.
Polizia-aurrekariak dituzten 21 eta 25 urteko atxilotuak Ertzaintzaren egoitzara eraman zituzten dagozkion izapideak egitera. Horiek amaitu ondoren, datozen orduotan eramango dituzte epailearen aurrera.
Jarrai gaitzazu Twitter bidez
@ertzaintzaEJGV
