Bere ardurapean duen Santurtziko tabernan drogarekin trafikatzeagatik atxilotu dute

Ertzainek 33 urteko gizon bat atxilotu zuten atzo, astelehena, goizean Santurtzin, bere ardurapean duen ostalaritzako establezimenduan haxixarekin eta kokainarekin trafikatzea leporatuta. Lokalean substantzia sorgorgarri batzuk eta dosiak saltzeko prestatzeko eta banatzeko bilgarriak aurkitu zituzten.

Urte honen hasieran hasi ziren ezartzen zaintza-dispositiboak Santurtziko taberna baten inguruan, aurretik ere drogen aurkako hainbat operatibo egin baitzituzten bertan. Operatibo horietan, otsailaren 16an, bertako zerbitzari bat atxilotu zuten substantzia sorgorgarriekin trafikatzea leporatuta.

Hurrengo asteetan ikertzaileek hauteman zuten etengabe sartzen zela jendea eta minutu gutxiren buruan irteten zela, zerbait hartzeko astirik ere izan gabe, eta horrek agerian jartzen zuen lokalean droga-trafikoarekin zerikusia zuten jarduerak egiten jarraitzen zutela. Hori dela eta, establezimendua aktiboki zaintzen hasi ziren berriz, eta tabernatik irteten ziren bezeroetako batzuk geldiarazi zituzten eta haxixa edo kokaina erostera sartu zirela egiaztatu ahal izan zuten.

Horren aurrean, atzo goizean lokalean sartu eta miaketa egin zuten, eta substantzia sorgorgarriak eta monodosiak prestatzeko eta banatzeko bilgarriak aurkitu zituzten. Horren ondorioz, establezimenduaren arduraduna atxilotu zuten droga-trafikoaren delitua leporatuta.

Arrastatuak polizia-aurrekari ugari ditu, eta substantzia sorgorgarriak saltzen dituen talde kriminal bateko kidea izatea ere leporatu izan diote. Atxilotu zutenean polizia-egoitzara eraman zuten beharrezko izapideak egiteko eta gero agintari judizialaren eskuetan jartzeko.